პიტნა (Мята) (Mentha) ჯანმრთელობა და მედიცინა

პიტნა (Мята) (Mentha).

პიტნა ხალხურ მედიცინაში ერთ-ერთი უძველესი სამკურნალო მცენარეა. დავით ბატონიშვილი ”იადგარ დაუდში” არა ერთ ადგილას მოიხსენიებს მას. მოვიყვანთ რამდენიმე ციტატას:
- ”ვინცა პიტნის წყალი გამოჰხადოს და ქაფურითა გააყენოს და შუბლზედა დაიდვას, მაშინვე ცხვირსა სისხლი დასწყუიტოს”.
- ”ვინც თბილ-თბილი პიტნისა ან კაპრის წვენი ყურშიგა ჩაიწუროს, თუ მატლი და ჭია უქლეს, მოკლას და ტკივილი უშველოს, და სისხლისა და ბალღამსა გამოსწმენდს”.
პიტნა და პიტნის ეთერზეთის შემადგენელი მენთოლისაგან დამზადებული პრეპარატები ფართოდ გამოიყენება თანამედროვე მედიცინაში. მას უნიშნავენ გულ-სისხლძარღვთა, კუჭ-ნაწლავის, ღვიძლისა და სანაღვლე გზების დაავადების დროს. პიტნის მენთოლი და მისგან დამზადებული პრეპარატები გამოიყენება სტენოკარდიული ტკივილების, სპაზმების, მეტეორიზმის დროს. მენთოლი გამოიყენება კბილის საწმენდი პასტებისა და ფხვნილების წარმოებაში.
პიტნისაგან დამზადებულ პიტნის წყალს გააჩნია სადეზინფექციო თვისება. პიტნის ზეთი შედის პრეპარატ ”ოლიმეტინის” შემადგენლობაში, რომელიც გამოიყენება ნაღველ-კენჭოვანი და შარდ-კენჭოვანი დაავადებების დროს. აგრეთვე იგივე დანიშნულების პრეპარატ ”ენატინის” შემადგენლობაში.

სტატია მოგვაწოდა მაიკო ლომსაძემ